طمــوح الى …التغييـــر
ودرس جديد

ومسبب جديد من مسببات التفكير السلبى

لكى نكمل مسيرتنا فى مواضيع :

==>العيش فى الماضى<== أحد الاسباب الرئيسية للتفكير السلبى(نظرة متعمقة)

==>الروتيـــــن السلبــــى<== أحد الاسباب الرئيسية للتفكير السلبى(نظرة متعمقة)

اليوم سأتحدث عن , احد الاسباب الرئيسية للتفكير السلبـــــــى

مسببات التفكير السلبى ::
- البعد عن الله سبحانه وتعالى
- العيش فى الماضى
- المؤثرات الداخلية
- المؤثرات الخارجية
- الروتين السلبى
- الصحبة السلبية
- البرمجة السابقة
- بعض وسائل الاعلام
- عدم وجود اهداف محددة
- التركيز السلبى
- حالة المزاج المنخفض

لذا فقد قررت ان اتحدث على نوع خطير جداً
ولا يترك احد منا !!
ألا وهو :

حالة المزاج المنخفض

عمرك حسيت قبل كدا انك مش عايز تعمل حاجة ؟
عمرك حسيت انك ملكش مزاج تعمل اى حاجة من غير سبب !!؟؟
عمرك حسيت انك مرة ملكش نفس تتكلم مع حد ؟
مسمعتش حد قبل كدا قال :: مليش مزاج النهاردا ؟؟
والاحلى من كدا تسأله وتقول له ليه ؟ يقول لك مش عارف !؟

حالة المزاج المنخفض دى حالة صعبة اوى
بتخلى الواحد مش عايز يكلم حد , مش عايز يعرف حد , مش عايز يعمل حاجة
والسبب فيها بيكون انه مش عارف هو عايز ايه ؟
مش عارف هو بيعمل ايه ؟

تلاقيه دايما بسبب المزاج المنخفض بيتفرج على التلفزيون من غير سبب لساااااااااااااااعاااااااااات
من مسلسل لمسلسل , ومن فيلم لفيلم
ويبص يلاقى اليوم خلص ,, وهو معملش حاجة ,, وحاسس ان وجوده لا فائدة منه !

برده المزاج المنخفض بيخليه :
بيعمل حاجات من غير ما يعرف هو بيعملها ليه ؟
بيشرب سجاير كتير مثلا
بيشرب خمرا ! , او مخدرات !
اعاذنا الله واياكم منها ومن شر بلاويها
دا غير انه مثلا تلاقيه بياكل عمال على بطال , ليغاية ما يبقى قد الفيل


الشخص المصاب بالمرض دا بيكون شكله ازاى ؟
بتلاقى تعبيرات وجهه حادة اوى
مبوز كدا
حركاته حادة
تركيزة سلبى
سلوكه سلبى
عصبى
صامت دايما
منغلق فى معظم الاوقات على نفسه

حد منكم كدا ؟


الاكتئاب، أكتر أعراض الاكتئاب هو المزاج

فقدان الاستمتاع بالنشاطات اللى كان يستمتع بها
وضعف التركيز
وعدم القدرة على الانتاج
والتعب بعد أقل مجهود
كذلك فيه شوية اضطرابات فى النوم
تلاقيه بيعاني من صعوبة في النوم وتقطع النوم وكمان بيشعر بعدم الارتياح عندما يستيقظ من نومه وكمان يصحى بدرى عن الوقت اللى اتعود انه يصحى عليه ولا يستطيع النوم مرة أخرى
وبيحس بالدونية وقلة التقدير للذات وعدم الثقة بالنفس
وبيحس بالذنب من غير وجود سبب لهذا الشعور
وبيخليه يحس أنه السبب في مصائب الدنيا جميعها
ودايما تلاقيه فاقد الأمل في المستقبل ويشعر أن المستقبل مظلم و يشعر بأن لا أحد يستطيع مساعدته
وكذلك أن لا شيء يستحق أن يعيش من أجله
وفي هذه المرحلة كثيراً ما يفكر بأن الحياة لا تستحق أن يعيشها
وتراوده الأفكار الإنتحارية


فيه مرة زوج راح لدكتور كبير فى معالجة المشاكل الزوجية , وقال له ان مراته كانت زى الفل زمان وكانت نشيطة وكان متحمسة للحياة ومنتجة وكانت بتحب القراية وكانت بتحب الخروج وزيارة الاقارب و
ودلوقتى اتغيرت خالص خالص عن زمان
بقت قمة الملل ,
دايما متعصبة , حتى على ولادها !
وكمان مبقتش تقرأ , ولا تحب زيارة اى حد , ولا تخرج
عايزة تقعد دايما فى البيت , بترفض اى دعوة تجيلها مثلا للخروج !
كل يومها , انها تروح الشغل وترجع تانى تقعد قدام التلفزيون ساااااااااعاااااااااات لغاية ما تنام
بقت الحياة صعبة جداً معاها
فطلب منه الدكتور انه اجيبها له ؟
فقال لزوجته , فرفضت , وبعدين لما فكرت تانى قالت اما اروح له وخلاص
المهم راحت
فسألها : يومك ازاى ؟
فقالت له ! فقدت الاحساس بالحماس
حاسة بملل رهيب , مثلى مثل اى انسان فقد الاحساس بالشهية تجاه الطعام !!
يعنى مش بتحس بنفسها فى اى حاجة فى الحياة , ومن غير سبب !!؟؟
وقالت :
انها بتعمل فى شركة ادوية كبيرة فى منصب كبير ومرتب كبير
يعنى حياتها مستقرة جدا
وكانت نشيطة وعملية , وحياتها كانت جميلة جدا
وعندها اطفال متفوقين جداً فى الدراسة
يعنى نعمة كبيرة وفضل من الله سبحانه وتعالى
فسألها :
اخر مرة اخدتى فيها اجازة كانت امتى ؟
فقالت له من فترة طويلة لأنى ببقى مشغولة فى الشغل
وفى البيت , وفى الحياة الاجتماعية المعتادة , والدعوات الرسمية .. الى اخره
……………….

……………….
فدار حوار كبير معاهم , اتنهى بان الطبيب النفسى
اكتشف , ان السبب الرئيسى فى كل دا
ان حياتها , كلها عبارة عن عمل , والعمل مستمر فى الزمن
كل يوم عمل , وبيزيد العمل مش بيقل
فزهقت من الروتين دا (الروتين السلبى ,, وقد تحدثنا عنه سابقا) والزهق دا وصلها لانخفاض المزاج
فحسب بنوع من الرفض الداخلى من العمل اللى مش عايز يخلص دا !
لغاية ما وصلت لحالة , الانعكاس الداخلى , كما يسميه العلماء ,وهو نوع من الرفض الداخلى لكل ما يوجهه الانسان من مسؤليات

وبكدا , عرفنا بأن الحياة السلبية , والتفكير السلبى , والزهق من النظام اليومى المعتاد , بيخلى الانسان يحصل له حالة مزاج منخفضة ,
وبيخليه يشعر بفقدان فى الشهية من مسؤليات الحياة اليومية

فدايما , عايزكم , تعملو رفرش لحياتكم كل شوية
جددو حياتكم , اعملو اى شىء جديد
واعطو لنفسكم فرصة للتمتع بالحياة
لازم تاخدو فترات من الراحة كل وقت والتانى

أتمنى انى اكون قدرت اوضح لكم نقطة هامة من مسببات التفكير السلبى
والموضوع من اعدادى الشخصى , بالاستعانة ببعض المعلومات من كتاب قوة التفكير للدكتور إبراهيم الفقى مع معلومات اخرى متنوعة من النت

أخوكم :
ENG/A.S.A
أحمد صبرى

ولا تنسونى من صالح دعائكم بظهر الغيب
وصلى اللهم وسلم وبارك على سيدنا ومولانا محمد وعلى اله وصحبه وسلم

عند النقل يرضى ذكر المصدر , وهو مدونة المهندس أحمد صبرى ,
وذكر صاحب العمل
ولكم جزيل الشكر

أهلا وسهلا , بكم فى مدونة

طــموح إلى … التغييـــر

فى موضوع جديد ,, من مسببات التفكير السلبى

لكى نكمل مسيرتنا فى موضوع :

==>العيش فى الماضى<== أحد الاسباب الرئيسية للتفكير السلبى(نظرة متعمقة) بقلمى

اليوم سأتحدث عن , احد الاسباب الرئيسية للتفكير السلبـــــــى

مسببات التفكير السلبى ::
- البعد عن الله سبحانه وتعالى
- العيش فى الماضى
- المؤثرات الداخلية
- المؤثرات الخارجية
- الروتين السلبى
- الصحبة السلبية
- البرمجة السابقة
- بعض وسائل الاعلام
- عدم وجود اهداف محددة
- التركيز السلبى
- حالة المزاج المنخفض

ولقد قررت , أن اتحدث عن نوع هام جداً ألا وهو ,
الروتيـــــــــــــن السلبى
عايز واحد يسألنى ويقول لى ؟؟
ليه يا بو حميد اخترت الروتين السلبى ؟
سؤال جميل !!
علشان يا جماعة أكثر من 90% مننا عايش فى حياة الروتين السلبى
ايامه كلها , مجرد يوم واحد بس
لكنه بيتكرر

عمركم يا جماعة سمعتم حد بيشتكى من روتين حياته !؟
عمر حد منكم زهق من الحياة المملة اللى بيعشها كل يوم ؟؟
هل فيه حد منكم نفسه يغير روتين حياته ؟
الطبيعى ان كل انسان , بيدور على الامان والبقاء علشان يضمن لنفسه البقاء
ودى سماها العالم الشهير : كارل يونج => منطقة الامان والراحة
والمنطقة دى , هى المحيط اللى بيحس فيه الانسان بالامان والراحة
وبتتكون من تلت حاجات :
البيئة اللى بنعيش فيها
والعمل اللى بنعيش منه
والناس اللى بنعيش علشانها

علشان كدا قال ألبرت اينشتين : بشعر الانسان بالامان عندما يجد مكان يعيش فيه , وعمل يعيش منه , واشخاص يحبهم يعيش معهم
وفيه حكمة جميلة اوى بتقول :
لو وجدت مكان تعيش فيه فانت محظوظ , ولو وجدت شىء تعيش منه فأنت ذكى
ولو وجدت شخص تعيش معه فأنت سعيد ,ولو عندك كل هذه الاشياء فأنت من اغنى اغنياء العالم

والسؤال:
انا قلت الكلام دا ليه ؟

كل انسان , بيعيش فى روتين اجتماعى , ومهنى , وعائلى معين
بحيث يشعر بمنطقة الامان اللى عايز يوصل لها .
وهو بيشتغل , وبيعمل , وبيمارس حياته بطريقة معينة علشان يوصل لمنطقة الامان والراحة اللى اتكلمنا عنها
تمام
لو حدث اى تغيير فى الروتين الاجتماعى او العائلى او المهنى دا ,, بيشعر بعدم الراحة
وعدم الامان , وعدم السعادة
حتى ولو كانت التغيرات دى أحسن من الاول

والروتين السلبى :
هو ان الانسان بيعمل نفس الحاجة , بنفس الطريقة
كل يوم , كل دقيقة , كل لحظة ,
يومه , يوم واحد بس وبيتكرر كل يوم

يعنى :
تصحى من النوم , تشرب القهوة , وتفطر الفطار دا , وتنزل تروح الشغل
تعمل نفس الشغل اللى بتعمله كل يوم , واللى عملته السنة اللى فاتت , والسنين اللى فاتت
وترجع من الشغل هلكان , تاكل وتنام , وتكمل يومك بطريقة روتينية
لغــــــــــــــــــــــاية :
ما تحس ان مفيش اى معنى من حياتك !
عمرك حسيت بأحساس زى دا ؟

اكتر حاجة يا جماعة ممكن تسعد الانسان , انه يشعر بالانجاز والتقدم والنمو ,
انه يحس انه كل يوم بيتقدم
علشان كدا , يقول الدكتور ابراهيم الفقى , ان فيه خمسون فندق فى مونتريال بكندا عملو بحث عن احتياجات الانسان علشان يقدرو يجذبو عدد اكبر للفنادق بتاعتهم
فوجدو الترتيب كدا :
البقاء – الضمان-الانتماء- الاستقلال الذاتى -الحب – التقدير الذاتى – الانجاز-التغيير المعنى
شفتو :
الانجاز فى الترتيب السادس من احتياجات الانسان
ويقول المختصون فى البحث , ان الانسان بدون انجاز , لا يشعر لحياته معنى
وهو سبب رئيسى فى الانتحار , لأن الانسان الذى لا يشعر بمعنى لوجوده , سيرفض العيش فى هذه الحياة , فيحاول الانتحار

علشان كدا , الفنانة المشهورة , داليدا , لما انتحرت
وجدو ورقة كاتباها بخط ايدها بتقول فيها , لم أجد معنى لحياتى !!
علشان كدا انتحرت

علشان كدا , الانسان اللى بيعيش فى روتين سلبى
بيفقد الاهتمام بكل شىء فى حياته
حتى , عمله , بيفقد الاهتمام به ,ولا يجد اى طعم لاى تغيير , ويصاب بأكتئاب
وبالتالى يسبب تفكيــــــــر سلبــــــــــــــــــــــــــــــــــــــــــــى قاتل

وقبل ما أختم , أحب اقول :
انى اليوم بما انى خلصت امتحانات , وفى فترة نقاهه إلا انى حاسس بملل , عايز اشتغل
وانجز
واليوم , حاسس انى خرجت عن اطار الروتين السلبى القاتل
لأنى عملت موضوع متتـــــــــــاز زى دا
حقيقى انا سعيد جداً بأنى انجزته
وأخيراً :
من اليوم , قرر بقى تغير حياتك
خلى كل يوم , فى حاجة جديدة عن اليوم اللى قبله
اعمل اى حاجة , حتى لو كانت غريبة
يعنى انا مرة , غيرت طريقتى فى القراءة
قعدت فى غرفة مظلمة خاااااااالص , وشغلت نور الموبايل , وقعدت أقرأ فى الكتاب
حاجة جديدة ,تلغى الروتين السلبى
فاجىء نفسك بأى شىء جديد فى يومك
وخلى يومك يكون مميز عن اليوم اللى قبله

أتمنى انى اكون قدرت اوضح لكم نقطة هامة من مسببات التفكير السلبى
والموضوع من اعدادى الشخصى , بالاستعانة ببعض المعلومات من كتاب قوة التفكير للدكتور إبراهيم الفقى

أخوكم :
ENG/A.S.A
أحمد صبرى

ولا تنسونى من صالح دعائكم بظهر الغيب
وصلى اللهم وسلم وبارك على سيدنا ومولانا محمد وعلى اله وصحبه وسلم

عند النقل يرضى ذكر المصدر , وهو مدونة , أحمد صبرى ,
وذكر صاحب العمل
ولكم جزيل الشكر

أهلا وسهلا بكم فى مدونة,,

طمــــوح إلى …. التغيير

اليوم سأتحدث عن , احد الاسباب الرئيسية للتفكير السلبـــــــى

مسببات التفكير السلبى ::
- البعد عن الله سبحانه وتعالى
- العيش فى الماضى
- المؤثرات الداخلية
- المؤثرات الخارجية
- الروتين السلبى
- الصحبة السلبية
- البرمجة السابقة
- بعض وسائل الاعلام
- عدم وجود اهداف محددة
- التركيز السلبى
- حالة المزاج المنخفض

ولقد قررت , أن اتحدث عن نوع هام جداً ألا وهو ,
العيش فى الماضى

بالبلدى كدا ,
انا ليه اخترت النقطة دى بالاخص اتكلم فيها ؟
لأنها بكل بساطة أكثرها انتشار , فمن منا لا يفكر فى الماضى ؟؟
اكيد كلنا بنفكر فى الماضى
طب متيجو نشوف كدا ايه اللى بيخلى التفكير فى الماضى سلبى اوى كدا

سؤل احدة الحكماء المدربين للتنمية البشرية ,
ايه اكتر حاجة أثرت فيك ؟
فقال :
انا هنا الان بهذه الصورة فى الوقت الحاضر,
اما الماضى فقد انتهى بكل ما فيه, وانا لا استخدم قصص الماضى لكى يتقبلنى المجتمع
فسؤل :
أليس الماضى جزء من حياتك ؟
فقال:
فعلا هو جزء من حياتى ولكنه كان !!
اما الان فليس له وجود ,, فلو عشت فيه , سأجد اننى اعانى منه
فقال ::
هل السيارة تمشى بوقود الشهر الماضى ؟
فقلت : لأ بل بوقود اليوم !!
قفال :
نفس الامر مع الماضى , فما هو إلا مجرد تجارب وخبرات نتعلم منها فى المستقبل ,, ولكنه ليس له مكان فى حياتنا الان

ركزو معايا فى الكلمتين دول :
معظم الناس بتعيش فى الماضى

فلو كان الماضى كله سلبيات ,
فهما هيحسو بحزن فى الوقت الحالى ,
لأنك هتشعر بنفس مشاعر الماضى , دون ان تغير من الماضى فى شىء !!

أما بقى لو الماضى كله ايجابيات ,
فبرده هتشعر بالضيق فى الوقت الحالى دا , لأن ايام زمان احسن من دلوقتى
والعيشة ايام زمان اجمل من دلوقتى
وهتفتكر ايام الماضى لما كنت عايش سعيد وكدا ,, وتبدأ تقارن بين الوقت الماضى والوقت الحالى ,
هتحس ان الماضى أحسن ,, فهتحس برده بضيق !!
يعنى فى كلتا الحالات انت هتضايق هتضايق

فالانسان لا ميقدرش يعيش بجسده فى الوقت الماضى ,
بس يقدر يعيش بأفكاره , ومشاعره وأحساسيسه فقط ,
لأن الفكر لا يعرف المسافات ,
يعنى تقدر تفكر فى اى مكان وفى اى زمان , وتحت اى ظروف , فالعقل لا يتأثر بالزمن

يعنى لو فكرت فى الماضى , متفكر فيه بأحاسيسك بس , ولو الماضى سلبيات , هتشعر بنفس شعور الماضى فقط , دون تغيير الماضى !!
ولو كان الماضى سعيد , برده لن يفيدك فى شىء !
ولكن إذا أردت ان تكون سعيد , فكن سعيد فى الوقت الحاضر

معظم مشاكل الناس تأتى من شيئين ::
الماضى والمستقبل
فالتفكير فى الماضى , بيجيب احباط
والتفكير فى المستقبل , بيجيب قلق
والتفكير فى الماضى والمستقبل ,
بيجيب يــــــــــــأس

عايز تحطو قدام عنيكم , ان الماضى دا انتهى بكل ما فيه
والمستقبل لسه مجاش

يبقى المفروض تتعلم من الماضى وسابيات الماضى عشان متتعرضش لها تانى فى المستقبل
وتكون ماهر فى مواجهة تحديات الحياة , وفى التعامل مع الحياة

ولو صممت انك تفكر فى الماضى بس , هتلاقى نفسك سجين للمشاعر السلبية اللى ملهاش اصل ولا وجود إلا فى ذهنك بس


والسؤال :
هل ينفع تركب مع سواق تاكسى بيسوق لورا ؟؟
ينفع ؟
اكيد لأ ,,
لانه اول ما يمشى هيخبط فى اى حاجة تقابله ,
نفس الوضع مينفعش انك تفكر فى الماضى بس ,, هتصطدم فى المشاعر السلبية , وهتضيع حياتك فى سجن الماضى

أخيراً :
عيش كل يوم بيومه
انسى الماضى ,
اتعلم منه , وخد دفعة عشان نتطلق للامام

أتمنى انى اكون قدرت اوضح لكم نقطة هامة من مسببات التفكير السلبى
والموضوع من اعدادى الشخصى , بالاستعانة ببعض المعلومات من كتاب قوة التفكير للدكتور إبراهيم الفقى

 أخوكم :
ENG/A.S.A
أحمد صبرى

ولا تنسونى من صالح دعائكم بظهر الغيب
وصلى اللهم وسلم وبارك على سيدنا ومولانا محمد وعلى اله وصحبه وسلم

عند النقل يرضى ذكر المصدر , وهو مدونة المهندس , أحمد صبرى ,

وذكر صاحب العمل
ولكم جزيل الشكر

وأهلا بك فى هذا الموضوع ,,واحييك لوجودك هنا ,,لأنك اخترت الموضوع الصح

العيب فى أهـــــــــــــــــــــالينا
انا مقدرش الومك فى حكمك على اهلك !!
فعلا ,, يمكن اهلك قامو بتربيتك بطريقة غلط !!
او بطريقة ,, فيه الافضل منها
يمكن اهلك مهتموش برأيك ,, لأنهم شايفين انك لسه عيل لسه صغير ولا يعتد برأيك !! حتى ولو كان صح
اهم شىء عايز اوضحه قبل ما اتكلم ,,
ان أهلك لو كان عندهم طريقة أفضل من كدا ,, مكنوش بخلو بيها عليك
يعنى أهالينا ,, غلطو فى حقنا ,, بس بحب ,, بس فى نيتهم انهم يشوفوك أفضل مخلوق على الارض كلها

بمناسبة العربيات يعنى , لأنى ناوى اشترى واحدة
لما بتكون لسه بتتعلم سواقة السيارة ,, وتمشى بالعربية تقوم تدوس بنزين جامد وتبهدل فى العربية ؟؟
يا ترى ليه ؟؟
هل انت مش طايق العربية للدرجة دى ؟؟
للاسف لأ !!
كل الموضوع انك معندكش طريقة افضل من كدا تسوق بيها السيارة
دا أفضل ما عندك
ولو كان عندك طريقة افضل ,, كنت اكيد اكيد اكيد استخدمتها
صح كلامى ؟

فيه أفتراض فى البرمجة اللغوية العصبية (NLP) بيقول :
يستخدم الناس أحسن اختيار لهم في حدود الإمكانيات المتاحة في وقت بعينه.

يعنى ايه دا ؟؟
يعنى ,, لما أهلم يغلطو فى حقك ,, يعنى دا أفضل ما لديهم !!
لأن لو فيه أفضل من كدا ,, عشان يعطى نتائج افضل ,, أكيد أكيد بلا ادنى شك كانو استخدموه

يا جماعة ,, اهالينا مأخدوش دكتراه فى التربية وفن التعامل مع الابناء !!
أهالينا نشأو فى بيئة مكنش فيها علم !!
يعنى مثلا على سبيل المثال ,, والدى الله يرحمه ,, كان متعلم ,, وكان اللى مثله فى البلد متعلم حوالى 5 او 6
!!!!
أهالينا أكيد أكيد يتمنو لنا انهم يشوفونا أفضل ما يمكن ,, بس الوسائل اللى كانت متاحة لهم مألتهمش لكدا

هتقولى مثلا //
أبويا هو سبب انى دائما خجول !!
امى هى السبب فى انى دايما مبحش اتكلم قدام حد
ابويا هو اللى أضعف ثقتى بنفسى
أمى علمتنى انى متخذش قرار أبدا فى حياتى
أبويا خلانى متحملش مسؤلية اى حاجة
..
.
..
.
..
هرجع أقولك تانى ,,
لو عرفو طريقة أفضل من كدا كانو منحوك أياها ,, على حسب الافتراض بتاع الـ NLP اللى قلته لك
هما ربونا غلط ,, بس بكل حب

هبطل السجاير ,, وأكون إنسان جديد (مقتبس من الاديب شعبان عبد الرحيم)
أقصد
هبدأ حياة جديدة

هل تعرف أن خلايا أجسادنا تتجدد باستمرار؟

هل تعرف معنى هذا؟

لو بصيت لأديك بعد شهرين تلاتة ,, هتلاقى كل الخلايا اللى فيها غير اللى كانت قبل كدا

يعنى اديك اتغيرت !!
يعنى لو بصيت لنفسك بعد سنة كاملة ,, هتلاقى نفسك تقريبا تقريبا اتغير فيك أكتر من 98% من خلايا جسمك !!
يعنى خلايا جسمك بتتغير !!
انت لسه عايز تفضل زى منت من غير ما تتغير ؟؟
يعنى بقولك , أبدا حياة جديدة
غير أفكارك !
غيرك أدراكك للحياة ,, عشان حياتك كلها تتغير
غير أسلوب تفكيرك ,, لأن منبع كل المشاكل اللى احنا فيها سببها الفكرة ,, خلاص غير الفكرة دى ,, هتلاقى حياتك تتغير

صراع بين الماضى , والحاضر , والمستقبل

انت خلايا جسمك بتتجدد يا اخى !!
كل خلية فى جسمك بتتجدد
مش ناوى بقى تجدد خلايا أفكارك !!
خلايا مخك دى ,, مش ناوى تجددها

بص معايا للمثال الحدق دا ,, هيبين اوى المعنى //
لما كل سنة معاليك تروح بشركة حاسب ,, وتقول لهم عايز اجدد كل امكانيات جهاز الكمبيوتر بتاعى ,, إلا البروسيسور !
تجدد الشاشة والكيبور والماذر بورد وكل حاجة
ونسيب البروسيسور !!
تخيل نفسك بعد 10 سنين من التجديد ولسه عايش ببروسيسور من 10 سنين فاتت !!
بالله عليك ,, لو شافك حد هيقول عليك ايه ؟؟
عبيط صح !!
لألأ
أكيد هيقول عليك مجنون !!
ازاى شغال على جهاز روعة زى دا ,, بالبروسيسور القديم دا !!

بالظبط نفس الفكرة ,,
انت ازاى عايش بالخلايا الجديدة دى
بنفس الافكار القديمة السلبية الغبية اللى بتأخرك دى !!
انت عايش فى الحاضر !!
ليه عايش بأفكار من الماضى !!
ويا ريت افكار ايجابيه ,, دا كلها سلبية !! هتفيديك بأيه ؟؟
هترجعك لورا ,, مش بتقدمك
لو فكرت فيها بنفس مثال الكمبيوتر ,, هتلاقى نفسك فعلا انسان عبيط أو مجنون !!

أذن أذن أذن
جدد أفكـــــــــــــــــــــــــــــــارك ,, وعيش حياتك

أنعش حيــــــــــــــــــــــــاتك

دى حتة كدا حلوة عجبتنى من الدكتور شريف عرفة بيقول ::

في مرحلة الطفولة: تنمو أجسادنا وتتطور عقولنا تدريجيا.. تستطيل قامتنا وتقوى عظامنا وتقوى عضلاتنا.. بمرور الوقت تحدث التغيرات الفسيولوجية والسيكولوجية في هذه المرحلة لنصبح أكثر نضجا..
لسبب واحد: هو أن نكون جاهزين كي نستطيع مواجهة الحياة حين نكبر..
في مرحلة الشباب: تكون أجسادنا قد اكتملت تماما ووصلت لقمة أدائها..
لسبب واحد: لأن الوقت قد حان كي نعيش هذه الحياة!

وانا هقولك , مش كفاية بقى أفكار سلبية عن الحياة كلها وعن أهلك وعن عيلتك واصحابك و و و و
مش كفاية بقى لوم فى الظروف وفى اهلك وفى الجيران انهم سبب مشاكلك ؟؟
مش كفاية بقى افكار سلبية !!
مش كفاية بقى حياة اللعب والهلس والعيش للاشىء !!
مش حان الوقت انك تكون الانسان اللى انت تتمناه ؟
مش حان الوقت انك تبدأ بداية صح ,, وتبدأ صفحة جديدة من كل الناس ؟
مش حان الوقت ان تتقبل أهلك زى ما هما ,, وتتعامل معاهم بأفضل طريقة ممكنة

أظن ,, أنها حياة واحدة ,, يا تعشها صح يا متعشهاش


وبكدا نكون وصلنا لنهاية الموضوع ,, بس ممكن واحد يوصل لاخر الموضوع وميعرفش انا عايز ايه ؟!
فخلاصة الموضوع كالتالى :
1- أتحمل مسؤلية الحياة اللى انت عايشها وبطل بقى ترمى اللوم على البيئة اللى انت عايش فيها
2- عرفت ان اهلك فعلا غلطو فى حقك ,, بس بدافع الحب ودا كان أفضل ما لديهم .
3- الحياة هتعشها مرة واحدة بس والله ,, فأنت بأيدك القرار أنها تكون حياة سعيدة طيبة ,, وأنها تكون حياة شقية مقرفة بائسة ! انت اللى بتقرر (ولله الأمر من قبل ومن بعد).
4- بطل تعيش بقى فى الماضى ,, أنسى الأفكار السلبية المحبطة اللى بتأخرك ,, وعيش مع الحاضر
وفى النقطة دى أنصحكم بالموضوع دا
==>العيش فى الماضى<== أحد الاسباب الرئيسية للتفكير السلبى(نظرة متعمقة) بقلمى
5- حط دايما فى بالك , أن خلايا جسمك ببتغير دايما مهما حصل ,, (مجتش مرة الخلايا دى تقول , انا مزاجى مش ولابد النهاردا والله منا متغيره) وأفتكر دايما مثال الكمبيوتر اللى بتجدده كل سنة.
6- حط دايما فى بالك , ان أساس التغيير يبدأ من الفكرة ,, أصل المستودع اللى كله أفكار سلبية ,, كانت فكرة صغيرة وكبرت لغاية ما بقت بالمنظر دا ,, أذن أساس تغيير أى شىء يبدأ من الفكرة . (عاملها لواحدها اهو بلون أزرق عشان تحسو انها مميزة ومهمة وخطيرة اوى)

بس خلاص ,, وكل سنة وانتم طيبيــــــــــــــــــــــــــــــــــــن
الموضوع ,,فكرته جت ليا من فكرة مقالة كويسة للدكتور شريف عرفة
بس كل المحتوى بتاعى انا وأفكارى انا عدا الاقتباسات الموجوده

بالله عليكم ,, ثم بالله عليكم ,, ثم بالله عليكم
لو الموضوع أفادكم ,, لتفتكرونى بدعوة طيبة خالصة لله بظهر الغيب ,, حتى يصلح الله لى أمرى

الخلايا تموت وتولد خلايا غيرها لتقوم بنفس الوظيفة..
خلايا الجلد –مثلا- تتجدد مرة واحدة كل شهر، وخلايا غلاف المعدة الداخلي تتجدد مرة كل أسبوع وخلايا العظام تتجدد مرة كل ثلاثة أشهر، وخلايا الكبد تتجدد مرة كل ستة أشهر إلخ…